Ez zaitez Los Angelesera joan.
.
Ematen du mitin batean gaudela (gure alderdiko gazteria atzeko aldean, ohiko moduan) edo zerbaiten kontrako manifestua irakurtzen (hortik gure aurpegi serioak). Baina ez, Habitat liburuaren aurkezpen egunean hartutako argazkia da beheko hori. Eta, kontrakoa dirudien arren, oso ondo pasa genuen.
Argazkian: Xabier Mendiguren (editorea), ni neu, Miren Agur Meabe (idazle eta laguntzailea), Patxi Plazaola (Beasaingo alkatea) eta Joxe Begiristain (CAFeko euskara arduraduna).
Aurkezpenaren berri, agian zehaztasun handiagoz, hemen ere ematen dute:
*Berriarako idatzitako kronika mitineroa.
Mitina edo «lehendakariaren ekitaldia/gerturaketa» (sic) Guggenheim aurreko zabalgunean da, eta ni okerrenaren esperoan abiatu naiz hara. Iluntzeko zazpi eta erdietan hasten da EAJren ekitaldia, eguzkitsua izan den baina dagoeneko tenperatura gasteiztarrak parekatzen hasi den astearte bilbotar honetan. Izoztuta eta zutik egon beharko dut, takoiekin gainera, esku batekin oharrak hartzen saiatzen naizen bitartean. Oharrak hartzeari utzi eta noizean behin txalo egin beharko dudala ere bururatzen zait, eskuak berotu aldera, noski, baina kazetari suposatzen zaien inpartzialtasunaren aurka eginez modu argian.
Baina ez, nire beldurrek ez dute fundamenturik batere. Museo aurreko zabalgunean karpa bat dago, barruko fokoek giroa epeltzen dute, eta «kazetaria» naizela aldarrikatu dudanean, agertokiaren eskuinaldean dagoen mahaiak erakutsi dizkidate. Eseri egin naiz, atera dut nire libreta (profesional itxura emateko) eta itxarotera jarri naiz, inguruari begira. Jazz talde batek Axuri Beltza kantaren bertsio swingdun bat eskaintzen digu. Prentsa arduradun bat gerturatu zait orduan, eta «laguntzeko dokumentazioa» deitu duen txosten bat entregatu dit. Sabin Etxetik dator zuzenean, eta ekitaldia/gerturaketa honetan jazoko denaren berri ematen du, lehenaldian idatzita gainera: ekitaldian ez dakit nor egon zen, ez dakit nork hitz egin zuen… zertarako etorri gara, orduan? Benetan ez nekien kazetarien lana hain erraza eta erosoa zenik. Halako batean zerbitzariak ere ikusi ditut, beltzez jantzita eta mahai altuak txukuntzen: pintxoak eta ardoa, esan dut neure baitarako, EBBren prentsa bulegoak bezala nik ere nire iragarpen zehatzetarako boterea baliatuz.
Zazpi eta erdiak dira. Puntual dator Ibarretxe. Jendea urduritu delako jakin dut. Agertokiko pantailan ikus ditzaket lehendakariarengana gerturatzen diren emakume guztiak. Argazkiak nahi dituzte berarekin, George Clooney arabarra nonbait.
Fan guztiak gainetik kendu dituenean, agertokira igo da Iñigo Urkullurekin batera. Urkulluren gorbata bat dator agertokiaren atrezzoarekin: dena da berdea. Musika taldeak Agur, Jaunak jo du, swing ukitua galdu gabe. Izaskun Bilbao da oinarekin erritmoa ondo daraman bakarra. Isildu egin da gero karpa osoa. Gorbata berdedunak ekin dio. Musikarientzat izan du lehenengo hitza: EAE, Nafarroa eta Iparraldeko musikariek osatzen dute gaurko taldea, saldo exotikoa dudarik gabe. Bitartean, Ibarretxek kazetarion aldera begiratu eta agur egin digu eskuarekin, banan-banan, ohitura duen bezala.
Urkullu aspergarria da. Erdizka baino ez ditut jarraitzen haren hitzak. Guggenheim duela hizpide uste dut, «modernitatearen totema», «ekonomiaren traktorea» eta «titaniozko aldaketa sakona» aipatu baititu.
EBBko buruaren hitzek kulunkatuta, publikoari begira geratu naiz: Ardanza, Atutxa, Zenarrutzabeitia, Josu Jon, Iñako EHUko errektore ohia… denak zutik, eta ni eserita. Urkulluk titaniozko gezi bat zuzendu dio Patxi Lopezi: ondo ulertu badut, Urkulluren aburuz Patxi Lopezen asmoa Guggenheim museoa lurrarekin berdintzea da. Lortzen ez badu, proiektu kulturalaren izen ona zikintzearekin konformatuko da. Isildu egin da azkenik gure Iñigo.
Konpromiso bat hartuz hasi du Ibarretxek bere mintzaldia: kanpaina bukatu aurretik Izaskun Bilbaorekin Simon&Garfunkel-en Bridge Over Troubled Waters dantzatuko du.
Orain arte sekula egin ez dudana onartuko dut: Ibarretxek badu karisma apur bat. Badaki seduzitzen. Euskaraz ari denean ere, sinesgarria eta konbentzitua ematen du. Gorputzak laguntzen dio. Aurpegiaren kolorea aldatuz doa, zuritik gorrira, gorritik berdera, gai bakoitza lagunduz. Etxea aipatu du, baina ez Kepa Junkeraren diskoa, ezta Habitat liburua ere, baizik eta bere etxea. Ajuria Enea, pentsatu dut nik. Ez ba: Euskadi omen da bere etxe bakarra. Itxaropena ere aipatu du, bere karteletako obamaniak hartuta. Datu ekonomikoak eman ditu: makina bat eta guztiak buruz (txalo mental bat, nire partetik). Ingelesez ere egin du: local moves the world. Emakume eta gizonen arteko berdintasuna izan du hizpide: gizartearen proiekturik garrantzitsuena, dudarik gabe (txalo zaparrada). Txema Agirre ekarri du gogora, ETAk eraila Guggenheim museoaren inaugurazio egunean. «ETA kanpora» esanez bukatu du bere saioa.
Aurkezlearen esanetan orain hasiko da benetako «gerturaketa». Eta zerbitzariak martxan ikusi ditut. Eta hunkitu egin naiz. Benetako kazetariak ordenagailu eta edizio-mahai mugikorrekin lanean utzi ditut, eta nire benetako izaera agerrarazi dut. Kopa bat ardo lehenik, bakailao, urdaiazpiko eta langostino pintxoak gero. Inongo lotsarik gabe. Mundu guztia koadrilatxoetan bildurik dago. Ni, ordea, kopa ardo eta pintxoen bakardade goxoan. Bakarrik dagoen morroi baten eskuinaldean kokatu naiz, estrategikoki kokatu ere. Atutxaren bizkartzaina da, eta pintxo erretiluek ez diote inongo zirrararik pizten. Hobe horrela: pintxo gehiago niretzako.
Datorren asteazkenean, hilak 25, Andu Lertxundiren bigarren bisita disfrutatu ahal izango dugu Santutxuko Irakurlearen Tartean. Oraingoan “Zoaz infernura, laztana” bere azken nobelaren aitzakia hartuta ekingo diogu saioari.
Bazatoz?
Otsailaren 25ean, eguastena, arrastiko 20.00etan Santutxuko AEKren Txurdinagako euskaltegian (Arbidea, 21). Uxue Alberdi izango dugu moderatzaile lanetan.
Heldu egin da. Etxera behintzat bai. Eta datorren astetik aurrera, heldu behar duen tokira, zorte on apur batekin.
Habitat heldu berria
Sozietatean ere aurkeztu behar dut liburua, eta gonbidatuta zaudete aurkezpen horietara.
Bilbon, otsailaren 20an, ostiralarekin
Lekua: Bilboko Elkar aretoan
(Licenciado Poza kalea, 11)
Ordua: 12:00etan
Gasteizen, otsailaren 27an, ostiralarekin
Lekua: Gasteizko Elkar aretoa
(San Prudentzio kalea, 7)
Ordua: 19:00etan
Hasieran Onanismo Onirikoa etorri zen. Gero, Etiope bat Martitzen. Gauez eta Azpikeriaz izan da, uste dut, gehien iraun duena. Baina hura ere ahitu egin da. Beraz, oker ez banabil, Habitat berri hau nire laugarren bloga da, hain zaharra al naiz?
Liburu baten eskutik jaio da gainera laugarren blog hau: Habitat, nire bigarren ipuin-liburua (eta honek ez nau kezkatzen, seguru “idazle gaztea” izaten jarraituko dudala urte batzuetarako).
Blogari zahar eta idazle gazte honek ongietorririk beroena ematen dizu habitat berri honetara.
Blog hau ezinezkoa izango litzateke Iruri Knörr lagun eta adituaren laguntzarik gabe. Mila esker, Iru.
Oraindik gauza asko txukundu gabe daude. Eman bueltatxo bat eta berehala ohartuko zarete. Zuen iruzkin, aholku eta purrustadak estimatuak izango dira (edo horren itxura egingo dut, behintzat).
Laster arte